Rev 15 | MED | STEP | Wote, na kᵾndᵾr mel, wi muⱡ ila uⱡ min ngᵾn pi mam ti, ekit oⱡnga, na kandᵾp rut nit. Ni kᵾn, anggelo 7 kat ndi, wamp etᵾk kit munding ei nga mbun, 7 kit kat ambulk morung. Mbun kit kᵾⱡ, Got nga popᵾⱡ kᵾⱡ, ambulk morung. Got nga popᵾⱡ 7 kᵾⱡ, pora nim kᵾn, wote uⱡ ti iti natᵾmba.

Revelation of John 15

Anggelo 7 Kat Ndi, Mbun Kit 7 Mat Ambulk Morung.

1 Wote, na kᵾndᵾr mel, wi muⱡ ila uⱡ min ngᵾn pi mam ti, ekit oⱡnga, na kandᵾp rut nit. Ni kᵾn, anggelo 7 kat ndi, wamp etᵾk kit munding ei nga mbun, 7 kit kat ambulk morung. Mbun kit kᵾⱡ, Got nga popᵾⱡ kᵾⱡ, ambulk morung. Got nga popᵾⱡ 7 kᵾⱡ, pora nim kᵾn, wote uⱡ ti iti natᵾmba. 2 Wote na ndi, kundᵾr mel, num kuta mam ei mel ti, kiraipa kᵾn, ndip kᵾn tᵾk rakᵾndᵾk mim etᵾng. Wamp mat, el etᵾk kai mondᵾk, mel rakra ei nga mim etᵾng. Ei nga, mbi ila tip timal mat etᵾng. Wamp mbᵾ, num kuta kiraipa mel, ei nga ᵾldᵾ ila anggilik morung. Got ndi, wamp mbᵾ, gita mat ngurum mbᵾ, ambulk morung. 3 Got nga kongun wu Moses kᵾn, Sipsip Waⱡ raⱡ nga kinan mat rom rondᵾk, nᵾk mel, “Nim Nuim Got Ronduⱡ Purum Wu ei ka! Nim nga kongun etᵾn mbᵾ pora, mam itim ila tᵾn kandpᵾn rᵾt nᵾtmᵾn ei ka! Nim ndi, wamp mbᵾ nga pora Wu Nuim Mumuk ei molkᵾn, nim nga uⱡ etᵾn mbᵾ pora, kun mba kupa mint etᵾn. 4 Wu Nuim ye! Nim Wu Wingti tenda ei mint morᵾn. Wamp nam ti ndi, nim nga mundmong indi nandᵾpa, mbi paka rundi nandᵾmba? Ei mon! Wamp mbᵾ pora, nim nga mbi paka ronding. Uⱡ ei, nambuⱡ emel, nim nga uⱡ kun kai mbᵾ, pena ila ekit omba pora ndurum,” nᵾtᵾng.

5 Wote, ui ei kᵾn, na moⱡᵾp kundᵾr mel, muⱡ ila Got nga manga wingti ou ei, kumba tilinga, Got elim manga wingti ila murum. 6 Anggelo 7 kat ndi, wamp etᵾk kit munding, mbun kit 7 kat ambulk mek, muⱡ mbal eng nui rᵾⱡang pi, kai mat ralk, kan gol mat pepil ombil mbila, kan rok pendᵾk, Got nga manga wingti wak rok pena orung. 7 Wote, mel tᵾmbᵾkak kat kont mormin ni kᵾⱡ nga ti ndi, ming gol 7 kᵾⱡ tᵾpa kᵾn, anggelo 7 kᵾⱡ ngurum. Ming 7 kᵾⱡ ila, Got rᵾk rᵾk kont morum ei nga popᵾⱡ mbᵾ, peka ropa murum. 8 Got nga ronduⱡ mbᵾ kᵾn, rᵾⱡang eng nui mbᵾ kᵾn, tetᵾm ila ndip ikil mel, Got nga manga wingti ila peka ropa murum. Ei nga, wamp ti ndi kapⱡa, Got nga manga wingti ila mukᵾr pi napᵾmba mon! Anggelo 7 kᵾⱡ nga mbun kit kat, mek orung ni kᵾⱡ, kongun etᵾk pora ndangina kᵾn, wote wamp mbᵾ, kapⱡa mukᵾr ping.